मल्ल्याची आणखीन एक संपत्ति जप्त होणार

मल्ल्याची आणखीन एक संपत्ति जप्त होणार

 मल्ल्याची फ्रान्समधील १७ बेडरूम असलेली हवेली, एक सिनेमा हॉल, खासगी हेलिपॅड आणि नाइट क्लब आदी मालमत्ता विकली जाणार असून त्याच्यासाठी हा फार मोठा दणका असल्याचं मानलं जात आहे.

भारतीय स्टेट बँकेसह विविध बँकांचे सुमारे ९ हजार कोटींचे कर्ज बुडवून विदेशात पसार झालेला उद्योगपती विजय मल्ल्याचा बाजार उठला आहे. भारतात त्याच्या अनेक मालमत्तांवर टाच आलेली असतानाच मल्ल्याची फ्रान्समधील मालमत्ताही विकली जाणार आहे.

मल्ल्याने गिज्मो इन्व्हेस्ट एसए या कंपनीच्या माध्यमातून ल गॉ जादा नावाची हवेली खरेदी केली होती. या हवेलीवर त्यांनी कतार नॅशनल बँकेची शाखा असलेल्या अंसबाचर अँड कंपनीकडून कर्ज घेऊन १४० कोटी रुपये खर्च केले होते. मात्र बँकेने लंडनच्या कोर्टात खटला दाखल करून मल्ल्याची कंपनी कर्जाची परतफेड करण्यास अपयशी ठरल्याचं म्हटलं होतं. मल्ल्याने त्याचा साऊथ इंग्लंडमध्ये असलेला ५० मीटर सुपरयाट विकावा आणि कर्जाची परतफेड करावी, अशी मागणी बँकेने कोर्टात केली आहे. २६ कोटीच्या लोन सेक्युरिटीसाठी मल्ल्याने ही बोट गहाण ठेवल्याचंही बँकेने कोर्टाच्या निदर्शनास आणून दिलं आहे.

२०१५पर्यंत मल्ल्यावर लोन थकलेलं होतं तेव्हा ब्रिटिश मल्टिनॅशनल कंपनी डायजियो पीएलसीने त्याच्यावर ६५० कोटी आणि भारतीय बँकांनी ९ हजार कोटींचा दावा केला होता. त्यावेळी फ्रेंच आयलँड इल सँट माग्युरेटमध्ये त्याची १.३ हेक्टरवरील ही मालमत्ता अत्यंत जीर्ण झाली असल्याचं बँकेचे वकील गिडन शिराजी यांनी कोर्टाच्या निदर्शनास आणून दिलं.

इंटीरियर डिझायनर आणि बिल्डर या प्रॉपर्टीच्या डागडुजीमध्ये व्यस्त आहेत, असंही या वकिलाने कोर्टाला सांगितलं. बँकेने मल्ल्याकडून कर्जाची परतफेड व्हावी मागणी केल्यानंतर कोर्टाने मल्ल्याच्या संपत्तीच्या चौकशीचे आदेश दिले होते. या चौकशीनंतर रिअल इस्टेट एजंटने मल्ल्याच्या या संपत्तीत ७२ कोटींची घट झाल्याचं सांगितलं होतं. बँकेच्या माहितीनुसार या मालमत्तेची रंगरंगोटी अद्यापही बाकी आहे. मल्ल्या आणि कतार नॅशनल बँकेकडून कोणीबी याप्रकरणावर अद्याप प्रतिक्रिया दिलेली नाही. विशेष कोर्टात मल्ल्याच्यावतीने कोणीही उपस्थित नव्हतं.