पॅन-आधार कार्ड लिंक करण्यास मुदतवाढ

तुम्ही तुमचं पॅन कार्ड अजूनही आधार कार्डाशी लिंक केलं नसेल तर तुमच्यासाठी एक दिलासा देणारी बातमी आहे. पॅन-आधार लिंक करण्याची मुदत केंद्र सरकारने मार्च २०२० पर्यंत वाढवली आहे. सध्याची मुदत उद्या ३१ डिसेंबर २०१९ रोजी संपत होती.

आयकर कायदा १९६१ मधील तरतूद १३९AA नुसार, तुमचे पॅन कार्ड हे आधार कार्डाशी लिंक असायला हवे. यासाठीची मुदत आता ३१ डिसेंबर २०१९ ते ३१ मार्च २०२० करण्यात आल्याची माहिती CBDT (सेंट्रल बोर्ड ऑफ डायरेक्ट टॅक्सेस्) ने आपल्या अधिकृत ट्विटर हँडलवर दिली आहे.

ही मुदत केंद्र सरकारने आठव्यांदा वाढवली आहे. सर्वोच्च न्यायालयाने गेल्या वर्षी सप्टेंबर महिन्यात निर्णय दिला होता की आधार हे आता आयकर परतावा भरण्यासाठी आणि पॅन कार्ड मिळण्यासाठी बंधनकारक असेल. १ जुलै २०१७ पासून पॅन कार्ड असणाऱ्या प्रत्येक नागरिकाला आधार कार्ड मिळण्याचा अधिकार आहे.

आधार कार्ड युनिक आयडेंटिफिकेशन ऑथोरिटी ऑफ इंडिया (UIDAI) कडून भारतातल्या नागरिकाला मिळते तर पॅन हा दहा अंकी क्रमांक आयकर विभाग देतं. हा क्रमांक एखाद्या व्यक्ती किंवा कंपनीचा असू शकतो.