प्रसिद्ध काशी विश्वनाथ मंदिरात दर्शनासाठी जाण्याचा विचार तुम्ही करताय का?

प्रसिद्ध काशी विश्वनाथ मंदिरात दर्शनासाठी जाण्याचा विचार तुम्ही करताय का? मग मंदिराच्या गाभाऱ्यात दर्शनासाठी जाताना पुरुषांना धोतर-कुर्ता आणि महिलांना साडी परिधान करावी लागणार आहे. तरच तुम्हाला काशी विश्वनाथाचं दर्शन घेता येईल. उज्जैन येथील महाकाल मंदिराच्या धर्तीवर वाराणसीच्या काशी विश्वनाथ मंदिरात भाविकांसाठी ड्रेसकोड लागू करण्यात येणार आहे.

या नव्या ड्रेसकोडनुसार, काशी विश्वनाथ मंदिरात भगवंताच्या दर्शनासाठी पुरुषांना धोतर-कुर्ता आणि महिलांना साडी नेसावी लागणार आहे. हे पारंपरिक वस्त्रे परिधान करून गेल्यानंतरच भाविकांना देवाला स्पर्श करून दर्शन घेता येणार आहे. मंदिर व्यवस्थापनानं घेतलेल्या निर्णयानुसार, आता जीन्स, पॅंट, टी-शर्ट आणि सूट परिधान केलेल्या भाविकांना दर्शन घेता येणार आहे, पण देवाला स्पर्श करून दर्शन घेण्याची परवानगी मिळणार नाही.

दर्शनाची वेळ वाढवली

काशी विश्वनाथ मंदिरात स्पर्श दर्शनासाठी ड्रेसकोड लागू करण्याच्या निर्णयासह गाभाऱ्यात जाऊन देवाच्या स्पर्श दर्शनाची वेळही वाढवण्यात आली आहे. यासंबंधीचा निर्णय रविवारी मंदिर प्रशासन आणि काशी विद्वत परिषद यांच्यातील बैठकीत घेण्यात आला. यावेळी पर्यटनमंत्री नीळकंठ तिवारी देखील उपस्थित होते. मंदिरात स्पर्श दर्शनासाठी रोज एका तासाची वेळ निश्चित करण्यात आली होती. मात्र, मकर संक्रांतीनंतर या वेळेत वाढ करून ती सात तास करण्यात येणार आहे.